Mañá luns, 26 de setembro, celébrase o Día Europeo das Linguas, unha efeméride organizada conxuntamente polo Consello de Europa e a Unión Europea dende o ano 2001 coa finalidade de festexar a diversidade lingüística e cultural europea e promover a aprendizaxe das linguas. Malia agochar a realidade das linguas minorizadas, a cada pouco máis minguadas e amezadas, baixo un xenérico chamamento a aprender outras linguas como unha vía para valorar a diversidade lingüística, coñecer outras culturas e valorar a herdanza plurilingüe do continente europeo, é unha boa ocasión para traballar na aula o plurilingüismo dende a perspectiva galega.
A Secretaría Xeral de Polítia Lingüística reúne, tamén de modo moi aséptico, como se esa riqueza lingüística non estivese en perigo no noso país, unha serie de recursos e propostas para traballarmos co alumnado, comezando pola versión galega dunha presentación divulgativa do Consello de Europa:
Neste especial atopamos propostas de aula (con algún pequeno traballo de investigación para a posterior posta en común e reflexión xunto con algunha idea apenas enunciada: elaboración dun traballo audiovisual); algúns xogos que cumpría adaptar ao galego; e o conxunto de recursos do proxecto Linguas no camiño, que achega materiais audiovisuais e ligazóns útiles mais que xa ten un antecedente de maior rendibilidade didáctica como Os camiños das linguas ou como facer unha rota do plurilingüismo, do profesor Luciano Fernández.
Complétase o monográfico con información sobre a incumprida (un, dous, tres e catro) Carta Europea das Linguas Rexionais e minoritarias, cunha serie de ligazóns de interese, entre elas materiais elaborados polo profesorado (agradécese a inclusión dunha presentación -moi sintética- deste blogue) e recursos tomados sobre todo de Linguamón. Como diciamos, tamén aquí se bota en falta a perspectiva das linguas rexionais e minorizadas que poidan achegar ferramentas como o Mercator e Eurominority, agora que pechou o incómodo EBLUL – European Bureau for Lesser-Used Languages por falta de financiamento.
Se nalgún centro vos sumades a esta efeméride, podedes cumprimentar un formulario provisto polo Consello de Europa para publicitar todos os eventos e actos desta xornada.
Para concluír, unha selección de recursos e materiais máis enfocados ás aulas:
- As linguas do mundo (proposta de actividades en Aula de Lingua, blogue da área do IES de Breamo).
- Nós e a lingua (U.D. para Bacharelato en Aula de Lingua).
- Linguas minorizadas (conxunto de entradas que contextualizan o traballo xa referido Os camiños das linguas ou como facer unha rota do plurilingüismo. No blogue Dis ti 3º, xaneiro de 2008).
- Usos e actitudes lingüísticas (prof. Luciano Fernández).
- Linguas e mais linguas (procura do tesouro).
- Linguas en contacto (proposta de traballo) (en Caderno de Lingua, tamén inclúe unha escolma de recursos de diferente autoría).
- Por que o preguntas? (monográfico da CGENDL sobre actitudes lingüísticas).
- Linguas minorizadas e linguas minoritarias (presentación de Xenevra).
- A Europa das Linguas. Achegamento á realidade lingüística basca, galega e bretoa (U.D. de varios autores. Edición da AS-PG).
- Caderno de Actividades da mostra Ser lingua non é fácil, elaborada polo Equipo de Normalización da EOI de Ourense.