Arquivo por etiquetas: Xunta de Galicia

Unha nova Carta Xeométrica para se orientar nos tempos galegófobos

Hai uns días sorprendiámonos, cando menos os seus numerosos seguidores, da caída do blogue Taboleiro Verdadeiro, que era o nome último da bitácora que se coñecía como O Taboleiro do Colmeiro, un espazo na rede “sobre o ensino en galego, con noticias en galego da lingua galega e da normalización do noso idioma, o galego”, que se caracterizou nos últimos meses por facer un seguimento constante e unha análise brillante do que está a acontecer coa nova política lingüística da Xunta de Galicia. Non imos entrar nas razóns  que provocaron a súa fin (moi significativas, por outra parte, do que está a pasar e pode pasar en breve no ámbito do traballo a prol da lingua nos centros educativos) mais si quixeramos recoller a actitude que marca esta súa nova etapa:

Nada máis saír do meu cadaleito atopei aquí mesmo, no Museo do Pobo Galego, unha reunión de profesores de ciencias que se xuntaron baixo un noble obxectivo: eles impartían as clases en galego e afirmaban que seguirían a facelo a pesar da implantación do funesto decreto 79/2010, o chamado de plurilingüismo. Mestureime entre les e enseguida comprendín a razón da miña resurrección; xa sei o que vin facer aquí, a esta nova vida, e así o declaro:

“Eu, que apliquei a trigonometría á terra para facer o mapa de Galicia e, como a terra quere lingua, quero agora aplicar a miña ciencia á lingua para pintar a face do noso mellor ben colectivo: o galego”.

Tal e como celebran os/as amigos/as de Trafegando Ronseis, súmome á benvida dun novo blogue que recolle todo o arquivo de entradas daquel taboleiro para continuar ofrecendo unha información contrastada e actualizada e unha ollada crítica aguda e racional sobre a política de derrubamento sostido e planificado dun dos piares da nosa identidade colectiva, a lingua, nun ataque ao mesmo Estatuto de Autonomía e á Lei de Normalización Lingüística. Trátase de Carta Xeométrica, que como aquela que Domingo Fontán elaborou ao longo da primeira metade do século XIX ha servirnos de orientación nos tempos da galegofobia institucional. Xa a podedes atopar tamén no Planeta ENDL.

Quixera completar esta entrada con dous artigos que dan boa conta do percorrido da política lingüística oficial nos últimos quince meses: Onde quere situar Feijóo o estatus do galego?, de Manolo Bragado, e O que vai supoñer o decreto contra o plurilingüismo, publicación do ENDL do IES da Pobra, que ademais  de compilar algunhas mostras da involución sufrida neste ámbito e os posicionamentos plurais contra o decretazo,  ofrece unha boa folla de ruta  para responder dende o ensino.

Unha parábola do negacionismo lingüístico

O rumor estendeuse como unha lapa de lume alimentada polo vento do sur. Disque querían derrubar a catedral, construída nove séculos antes, para edificar no seu predio un gran centro comercial. As razóns non deixaban lugar a dúbida, o declive constante do número de peregrinos e de practicantes da relixión de culto no templo por un lado e, polo outro, o incremento no número de posibles consumidores do centro de ocio consideraban idónea tal muda. O verdadeiramente sobresaliente non foi o estrambótico da idea senón os aplausos duns, escasos pero ruidosos, e o silencio dos outros. As razóns de utilidade estrita daban couces contra as pedras de brión cargadas de historia. O patrimonio nunca foi ben levado co progreso irracional. Por aqueles que defenden como mellor maneira de gañar o futuro o avance dos exércitos, ese que destrúe todo ao seu paso. E, claro, un dos argumentos máis esgrimido era a indefensión dos consumidores ante o poder da memoria. Que dúbida ten. A idea, lanzada como globo sonda, por algún reduto de accionistas do centro comercial foi callando ata mesmo facer dubidar o goberno da cidade. Tanto balbordo nos medios de comunicación, tanto ruxerruxe na rúa fixo por fin debater a aqueles que gobernan coas portadas na man. E, dixo algún, se cadra unha superpantalla de cine ha ser mellor cás apertas ao apóstolo, así seremos máis internacionais, máis globalizados, menos pailáns. Por uns e por outros, o proxecto do centro comercial foi medrando ata se converter no miolo da actualidade. Cando xa as máquinas de derruba se aproximaban á torre do campanario un pícaro preguntou: Nai, e se derruban a catedral, ¿quen vai saber quen somos?

Rosa Aneiros (Galicia Hoxe, 09-07-2008)

Podería desaparecer a Catedral de Santiago de Compostela? Acabará desaparecendo esta irrepetible e magnífica concreción do estro dos nosos devanceiros, sinal de identidade dun pobo, recoñecida e valorada máis alá das nosas fronteiras? A intensa actividade de colectivos especuladores como Galicia Bimilenaria, debidamente amplificados e apoiados por sectores económicos e mediáticos afíns, xunto co consentimento e a necesaria complicidade dun goberno que non cumprise os seus deberes estatutarios, podería facelo posíbel.

Grazas a Sofía por distribuír esta presentación de Miguel Anxo Mouriño, a quen lle pido desculpas por algúns cambios que tiven que facer para pasar o seu traballo a vídeo. A presentación está disponíbel para a súa descarga en Author Stream (e sen a marca de auga desta aplicación) e con vídeo de maior resolución en Vimeo.

Este é o compromiso da Xunta coa lingua galega

Os xornais de hoxe, luns 22 de marzo, incluirán esta campaña institucional da Xunta  con motivo da celebración do Día Mundial da Auga. Segundo reza o lema do anuncio, esta é unha data para festexar e animan a sociedade a se comprometer co noso medio ambiente os 365 días do ano pois dende o goberno galego xa se fai co “plan de infraestruturas hidráulicas”, o “plan de control de vertidos” e os “planes integrais de saneamiento das rías” (sic.).  Pois si, como se pode ver, o compromiso desta Xunta coa lingua non se manifesta nin tan sequera  nas campañas públicas, aínda que só fose por aparencia. Se lle botasen un mínimo de atención non publicarían este tipo de cousas… que  veñen sendo todo un símbolo da consideración que teñen do idioma.

Trátase dun anuncio propio dunha nova e cordial política lingüística e educativa: un pouquiño de galego, un chisco de castelán… mais bótase en falta outro tanto de inglés.

Campaña Institucional da Xunta de Galicia Día da Auga