No Día Mundial da Poesía, haikus para Xapón

Dende As Zocas Faladoras, o blogue da Biblioteca do IES de Poio, convídannos a sumarnos ao Día Mundial da Poesía elaborando haikus en homenaxe ao pobo xaponés, como xa fixeron na Aula de 6º B do CEIP Isaac Díaz Pardo do Burgo (Culleredo) a través da aplicación linoit (panel de anuncios colaborativo).

Dende o Caderno de Lingua animámosvos a que, ademais de compoñer haikus  en galego, llos fagades chegar aos galego-xaponeses Tadashi Yamamoto, a través dos comentarios deste artigo do blogue Fala Londres; Masashi Oki, por medio do seu propio blogue Imos a Galicia (ou ガリシア); e a Takekazu Asaka, embaixador da lingua galega no país nipón, ao que xa nos encargaremos remitirllos dende aquí mesmo. Nos últimos días puidemos seguir de primeira man, tamén en galego, as súas vivencias e reflexións tras a traxedia que vive o seu país e as súas xentes (aquí e mais aquí).

Se queredes ler haikus, na literatura galega temos exemplos en Uxío Novoneyra, Helena Villar Janeiro, O Leo, Marilar Aleixandre, Xoan Abeleira e  outros autores e colectivos poéticos. Tamén nos centros escolares se traballa esta modalidade poética, e con bos resultados, como no I Concurso de Haikus do Val Miñor organizado polos Equipos de Normalización e Dinamización Lingüística e Departamentos de Lingua Galega dos IES Auga da Laxe, Escolas Proval, Terra de Turonio e Val Miñor.

Para traballar a poesía de Uxío Novneyra

Dende o IES de Porto do Son achegamos uns recursos moi modestos para a celebración do Día das Letras Galegas 2010. Co fin de coñecermos a obra e a vida de Uxío Novoneyra, os Equipos da Biblioteca e Normalización e Dinamización Lingüística, xunto co Departamento de Lingua Galega, convocamos  un concurso de poesía visual no que alumnado recreará os versos do poeta do Courel por medio de caligramas e colaxes. Para iso, ademais de acudir aos materiais e recursos que numerosos docentes e colectivos poñen  á disposición de toda a comunidade educativa galega,  elaboramos unha breve antoloxía da poesía do autor, que inclúe composicións de diferentes graos de  complexidade para  a ESO e o Bacharelato, e unha presentación sobre as técnicas creativas do caligrama e a colaxe.