Arquivo por etiquetas: Ensino

Co outono, máis ‘Ollos de aula’ para as familias

O segundo número de Ollos de aula vén cargadiño de contidos nas súas humildes oito páxinas. As “Cadencias” de Gracia Santórum, apenas unha mostra de tantas e tantas boas recomendacións que nos fai en Trafegando Ronseis xunto con algunha proposta orixinal, a visión de Lois Ferradás (Decano de CC. EE. da USC) sobre as reválidas que recolle a LOMCE do Ministro Wert ou as pertinentes observacións e pautas sobre as entrevistas das nais e os pais cos titores dos seus fillos e as eleccións ao Consello Escolar, ademais da xusta defensa do labor educativo que desenvolven os Equipos de Normalización e Dinamización Lingüística na sección “Da lingua”, que recollemos máis abaixo.

Curriña, xeitosa, apenas unha neniña que comeza a botar os seus primeiros pasos e que quere medrar coa vosa atención e axuda, esta é a vosa Ollos de aula.

Da lingua Mellor en equipo

No número anterior, nesta mesma páxina, diciamos que, nos últimos anos, en Galicia o debate sobre o ensino non xirará ao redor do pedagóxico, senón do lingüístico, e explicabamos que a controversia foi tal que xerou unha especie de tornado que arrasou todos os acordos. No centro desa treboada foronsituados, por veces, e sen que eles o pretendesen, os Equiposde Normalización Lingüística (hoxe chamados Equipos de Dinamización da Lingua Galega). O seu traballo foi posto en cuestión, e algunha xente incluso se atreveu a propoñer a súa desaparición. O que desgraciadamente non se dicía nese debate é que detrás da vida cultural dos colexios e institutos está, en moitas ocasións, o traballo calado e constante dos equipos de normalización. Detrás da edición de blogs, dos encontros con escritores/as, do samaín, de centos de concursos, das obras de teatro, da revista escolar ou desta mesma revista que estás a ler agora, está o esforzo xeneroso de moito profesorado, alumnado e persoal dos centros. E é que os equipos veñen sendo, dende a súa creación no curso 1990-1991, moito máis ca un órgano destinado á promoción da nosa lingua. Grazas a eles en Galicia hai moito tempo que se fai aprendizaxe cooperativa (ás veces incluso sen ser conscientes diso), que ciclos e/ou departamentos traballan de maneira coordinada, que o alumnado ten ocasión de desenvolver competencias activas… Por iso nestes tempos de titulares e mensaxes simples hai que, como tamén diciamos no número anterior, reflexionar sobre estas cousas e pensar cales son os intereses que se agochan detrás destes debates.

Nace “Ollos de aula”

Coa volta ás aulas, retomamos tamén a publicación no Caderno cunha feliz nova: o nacemento de Ollos de aula, a “revista para as familias do alumnado” que edita a Coordinadora Galega de ENDL (podedes descargala aquí). Así se presenta esta nova publicación:

O que tes nas túas mans é o primeiro número de Ollos de aula, unha revista (revistiña) que chegou a ti grazas ao Equipo de Dinamización da Lingua Galega do centro no que estuda o teu fillo/a e á Coordinadora Galega de Equipos de Normalización e Dinamización Lingüística. Se todo vai ben, recibirala na túa casa unha vez ao mes.

O obxectivo da publicación é achegarvos información variada ao redor da educación e convidarvos a reflexionar sobre aqueles temas que vos poden preocupar como nais e pais. Ao longo das  distintas seccións procurarase darlle resposta ás preguntas que nos formuledes, afondar en temas de actualidade, explicar conceptos propios do ensino ou achegarvos suxestións (lectura, música, viaxes…) para poder compartir cos vosos fillos/as, sen esquecer, loxicamente, a nosa lingua e as reflexións sobre a súa aprendizaxe.

Buscaremos sempre que os artigos sexan asinados por profesionais do ensino ou por especialistas na materia que se trate, co obxectivo de que a información sexa rigorosa e se axuste o máximo posible á realidade que se vive nos centros e nas vosas casas.

Somos conscientes da humildade destas oito follas, pero gustaríanos que Ollos de aula fose unha canle de comunicación entre o centro e as familias e poder, así, acompañarvos na difícil tarefa de educar aos vosos fillos/as.

Parabéns aos/ás compañeiros/as por esta nova iniciativa… que non ha de ser a última neste novo curso.

Crear comunidade en LGL

A innovación en LGL tamén pasa por encontrármonos en plataformas de intercambio de recursos, experiencias e reflexións; por coñecermos propostas e materiais; por crear grupos de traballo; por alfabetizármonos dixitalmente e por facilitarmos a alfabetización dixital do alumnado en paralelo ao desenvolvemento da súa competencia en comunicación lingüísitica.

A situación lingüística precisa de novos espazos de uso, presenciais ou virtuais, mais posibilitadores de actos comunicativos reais que respondan aos intereses do alumnado, por iso motivadores, nun contexto necesario que lle achega á lingua o capital simbólico das novas tecnoloxías e novos contidos para os novos soportes.

Trátase de situar os rapaces e as rapazas nun proceso educativo onde conflúan o ensino formal e informal, que potencie a aprendizaxe e a creatividade dende a interacción cos iguais, as emocións, a(s) identidade(s) e a soberanía persoal e grupal.

Este pode ser un bo lugar onde comezar; se cres que é unha iniciativa necesaria  primeiro debemos camiñar nós.

Felicita o nadal coa postal da Coordinadora Galega de ENDL

Vodpod videos no longer available.

Ti tamén podes personalizar e enviar ás túas amizades unha felicitación coma esta se premes aquí.

Feliz 2010 para ti, para os teus… para a nosa lingua!

Todos/as sabemos que os soños non se alcanzan sen esforzo, por iso no ano que comeza contamos contigo para seguirmos traballando a prol da lingua.

www.coordinadoraendl.org/videos/nadal.swf

Ti tamén podes personalizar para as túas amizades unha felicitación coma a que podes ver na ligazón anterior premendo aquí.

Campaña da Coordinadora Galega de ENDL

Na xuntanza mantida por un cento de coordinadores de Equipos de Normalización e Dinamización Lingüística (ENDL) dos centros de ensino públicos e privados no Instituto Galego de Información (Santiago de Compostela) o pasado sábado 28 de marzo, acordouse a constitución dunha Coordinadora Galega de Equipos de Normalización e Dinamización Lingüística para establecer dinámicas de colaboración entre os diferentes equipos, unha cooperación que permita compartir experiencias normalizadoras que redunden positivamente no traballo da dinamización lingüística nos centros de ensino galegos.

A primeira acción da Coordinadora Galega de ENDL é dar a coñecer o posicionamento público dos equipos sobre a derrogación do Decreto 124/2007, polo que se regula o uso e a promoción do galego no sistema educativo, anunciada polo novo goberno da Xunta de Galicia.

Por iso, convídase a todos os Equipos de Normalización a adherirse a este texto que se pode consultar na páxina web da campaña.

Hai dúas maneiras de achegar o apoio dos equipos:

1.- Enviando un fax ao número 981800064, no que, tal e como se recolle no documento adxunto, se identifique o centro educativo e o concello no que está situado, así como o nome e apelidos do coordinador ou coordinadora xunto co seu nº de DNI e o seu correo de contacto (o oficial da Xunta: edu.xunta.es) para facilitar a comunicación directa cos equipos no futuro.

2.- A través da propia páxina web http://www.coordinadoraendl.org/.

Dende a Coordinadora convídase a todos os Equipos de Normalización e Dinamización Lingüística a sumarse a esta iniciativa, ao tempo que se prega a súa máxima difusión entre os/as compañeiros/as dos ENDL, comunidade docente, blogues e webs, etc. co fin de obter o maior número de adhesións.

Convocatoria aberta a todos os Equipos de Normalización e Dinamización Lingüística

Rerproducimos o texto da convocatoria a continuación pregando a súa máxima difusión entre os membros dos ENDL dos centros educativos públicos, concertados e privados galegos.

Ola a todos/as

Somos un grupo de persoas que está a traballar en ENDL de diferentes centros de Ensino da zona de Santiago que nos xuntamos para falarmos de como podemos afrontar a nova situación canto á normalización da nosa lingua. Dado que as cousas van mudar, e parece que non para ben, consideramos que é necesario transmitirlle á sociedade e ao novo goberno o que pensamos ao respecto dos cambios anunciados. Por iso vos convocamos a unha reunión que se celebrará o vindeiro sábado 28 de marzo ás 16.30 da tarde no Instituto Galego de Información (IGI) (San Marcos, Estrada do Aeroporto, ao pasar o Hotel Apóstol Santiago). O obxectivo da reunión é o seguinte:

-Avaliarmos a posibilidade de facermos pública a nosa posición canto ao Decreto 124/2007, que se quere derrogar. Levaremos un texto base para consensuarmos antes de mandalo aos medios. Sería un texto de carácter técnico, como normalizadores que somos, e para nada incompatible con outros posicionamentos que poidan facer outras organizacións sociais e políticas que fagan algo ao respecto.

-Pensarmos na posibilidade de crearmos unha Coordinadora Galega de Equipos de Normalización e Dinamización Lingüística para actuar colectivamente a prol da nosa lingua tanto a nivel particular, nos nosos centros, como en xeral, na sociedade.

Por favor, comunicádelle esta convocatoria a todos cantos membros dos ENDL coñezades, e que polos motivos que foren non leron esta información. Agardamos contar coa vosa asistencia para entre todos poder traballar para conseguir obxectivos normalizadores.

Por favor, confirmade asistencia, se é posíbel, enviando un correo a miguel.louzao@gmail.com

Saúdos a todos/as

Miguel Louzao (IES Coroso-Ribeira)
Valentina Formoso (IES Félix Muriel- Rianxo)
Román Cerqueiro (CPI Aurelio-Cuntis)
Xesús Mosquera (CRA de Santa Comba)
Luís Aldegunde (CPI de Rois)
Sara Paz (CPI da Baña)
Pilar Buela (IES de Valga)
Ana Rial (IES Aquis Celenis de Caldas de Reis)
Gracia Sanctorum (IES Pintor Colmeiro-Silleda)
Sechu Sende (IES Marco do Camballón-Vila de Cruces)
Daniel Asorei (CPI de Touro)
Xoán Constenla (CPI de Portas)

Mapa de situación do IGI

A necesaria aposta polo software libre

 

Hai uns meses sabiamos que o SERGAS viña de gastar uns 650.000 € en licenzas de Microsoft, o que supuña un paso atrás na intención do goberno da Xunta de apostar polas tecnoloxías da información e, nese marco, polo software libre.

No ensino galego pasa o mesmo. Mentres os centros educativos seguen a gastar centenares de miles de euros en licenzas de Windows, outras administracións autonómicas -é o caso de Estremadura– levan xa tempo apostando polo software libre. É certo que parte da responsabilidade na súa posta en práctica recae nas direccións e no profesorado dos centros, mais é a Consellaría de Educación a que ten que liderar un plano ambicioso que inclúa a difusión do software en código aberto, a formación dos docentes e a adaptación do sistema informático interno… non vaia ser despois que, como aconteceu nestes últimos días no CPI don Aurelio, non se poida acceder ao XADE dende Mozilla.

No IES Xulián Magariños de Negreira levan tempo traballando nisto, os nosos máis sinceros parabéns.