Pedras contra tanques
Publicado por romanlandin on Xaneiro 7, 2009
Sigo o ronsel da Breve escolma para actuar desde a palabra ante o masacre do pobo palestino de Xano para, a xeito de neme por Palestina, traer aquí “Pedras contra tanques”, tema con letra de Suso de Toro que as Leilía incluíron no seu Madama.
Esas pedras contra tanques
eses corpos que rebentan
en libeliñas vermellas
toda a carne é sagrada.
Así como chuvia mansa
este mundo molla e sangra
a memoria non descansa
toda a carne é sagrada.
Vella liturxia da ira
alimenta a nosa rabia
odio con fame de sangue
toda a carne é sagrada.
O mundo perece aquí
a memoria non descansa
eu son ti e ti es min
toda a carne é sagrada.
